«Келешек үшін бәріміз жауаптымыз!» деген ұран биігінен «Qazaqstan da’y’iri» биыл да түспейді

Құрметті оқырман!

Биылғы ресми жылдағы беташар мақаламызды өткен жылы елімізде болған айтулы да дүбірлі оқиғалар легімен бастағанды жөн көрдік. Тарих қойнауына енген 2018-ші жыл егемен еліміз үшін берекелі әрі мерекелі жыл болды. Оған ешкімнің дауы болмас.  Өткен жылы тәуелсіздігіміздің символына айналған Ақордалы Астанамыздың 20 жылдық мерейтойын атап өттік. Бас қаламызды ұлықтауға барлық өңірлеріміз жұмыла атсалысып, бірлік пен ынтымақтың үлгісін көрсетті. Жыл басында Төртінші өнеркәсіптік революция жағдайындағы дамудың жаңа мүмкіндіктерін айқындадық. “Бес әлеуметтік бастаманы” жариялап, халқымыздың әл-ауқатын одан әрі арттыруды маңызды міндет ретінде белгіледік. Күллі түркі жұрты қастерлейтін Түркістан қаласы қайта түлеп, облыс орталығы мәртебесін алды. Шырайлы Шымкенттің халқы бір миллионнан асып, республикалық маңызы бар қала атанды. Біз халықаралық саясатта және экономикада маңызы зор шараларды жүзеге асырдық. Қазақстан Біріккен Ұлттар Ұйымы Қауіпсіздік кеңесіндегі екі жылдық қызметін абыроймен аяқтады. Дүние жүзінің алып елдері бас қосатын осы беделді органға қаңтар айында төрағалық еттік. Сапар барысында Президентімен кездесіп, маңызды уағдаластыққа қол жеткіздік. Әлемнің әр түкпірінен келген дін көшбасшылары Астанада жиналып, өркениеттер диалогына үн қосты. Ақтауда Каспий теңізінің құқықтық мәртебесін бекіткен тарихи құжат қабылданды. “Астана” халықаралық қаржы орталығын жаһан жұртына таныстырып, тың бастамаларды қолға алдық. Орталық Азия мемлекеттерінің бес президенті біздің елордада бас қосып, тату көршілік қатынастарды жандандырдық. Тәуелсіз Қазақстанның нышаны саналатын төл теңгеміздің 25 жылдығын атап өттік. Ұлы даладағы ежелгі көшпенділер өркениетінің жаһандық маңызын қайта жаңғырттық. Осы айтулы мерекелер мен ауқымды шаралар елдігімізді танытып, бірлігімізді бекемдей түсті. Әсіресе Елбасымыздың «Ұлы даланың жеті қыры» мақаласы бүкіл елімізге рух берер ерекше оқиға болды. Бұл жетістіктерге өздеріңізбен бірге жеттік, игі бастамаларды бірге жүзеге асырдық.

Біздің газетіміз де бұл айтылған оқиғаларға үн қосты. Уақыт легінен бір сәтте қалған жоқпыз. Әсіресе көтерілген қандай мәселелер болсын олардың мемлекеттік, ұлттық тұрғыда шешілуіне зор маңыз бердік. Ең бастысы біз көтерген қай мәселеде де қалың бұқара сырт қалған жоқ. Әрине, өмір болған соң ел ішінде көлеңкелі оқиғалар да болды. Өз қал-қадерімізше басалқы айттық, реті келсе жанайқайлар жаздық. Даудың өршуін емес, өшуін қаладық.  Әйтеуір шегінген сәттеріміз болған емес. Ұлт мүддесін қорғауда газетіміз алдыңғы саптан көрінді. Әрдайым ұлт зиялылары мен қалың қазақтың үмітін ақтап, сенімінің шоғын үрледік. Халықтың сөзін сөйледік.

Жиырма жеті жылдық тарихы бар, Алты алаштың көзайымына айналған газетіміз өз тұғырынан түспей, егеменді елдің жоғын түгендеп, барына аспай, жоғына саспай талғаммен қарады. Газет басшылығында ауыс-түйістер орын алғанымен, газеттің ұстанған бағыты өзгермеді.  Ол — шындық биігінен төмендемеу ұраны! Ол — алаш қайраткерлері айтқан  ұлтқа — адал қызмет ету  мұраты! Біз бұған адал болдық! Бола да береміз. Және «Qazaqstan da’y’iri»  бас директоры ретінде өзіме артылған жауапкершілікті терең сезінемін… Білімімді,  тәжірибемді ұлтқа қызмет етуге аямасым өзіме аян… Газет бетінде жарияланған әр дүние — тарих! Ол — газет ұжымының жүріп өткен жолы… Тағдыр — талайы… Бүгінгі қоғамның келбеті… Келер ұрпақтың бетіне ұялмай қарау үшін біз әділдікті ту етіп көтердік. Оған газет бетінде жарияланған уытты мақалалар, иықты сыни толғамдар, сүйекті көсемсөздер,  мәйекті ақпараттар, ол аз десеңіз, халықтың жоғын жоқтаған сараптама материалдар шоғыры дәлел!

Құрметті оқырман!

Күз айлары әдеттегідей баспасөзге жазылу науқанымен айшықталды. «Ауыл» экспедициясымен ұжым болып бүкіл республиканы аралап, жер-жерде оқырмандарымызбен кездесулер өткіздік. Осы экспедициямызға қамқор болған. «Нұр Отан» партиясы мен ҚР Ауыл шаруашылығы министрлігіне алғысым шексіз.

Иә, еткен тынымсыз еңбегіміз еш кетпеді. Таралымымыз жаман емес. Шүкір! Әсіресе Жамбыл, Қарағанды,  Солтүстік Қазақстан, Маңғыстау, Алматы және басқа да облыстардағы оқырмандарымызға, қолдаған мырзалар мен ханымдарға ризашылығымды білдіремін. Әсіресе ұлтжанды әкімдердің істеріне Алла Тағала береке бергей! Елбасының салиқалы саясатын бүркемелемей, керісінше,  халыққа кеңінен насихаттауда олардың еңбегі зор!

Сәуле Мешітбайқызы,

ҚР еңбек сіңірген қоғам қайраткерi

 

(5)