mm
Халықаралық "Қазақстан Заман" газетінің тілшілер қосыны бастығының орынбасары. ҚР "Ақпарат саласының үздігі"

Жаңа форматтағы атаулы көмек ел жыртығын жамай ала ма?

Қуанышты хабар бар. 2018 жылдың қаңтарынан бастап жаңа форматтағы атаулы көмек енгізілмек. Бұл туралы Үкіметтің селекторлық режімдегі отырысында ҚР Еңбек және халықты әлеуметтік қорғау министрі Тамара Дүйсенова айтты. «100 нақты қадам» жоспарында және Елбасының биылғы жылғы халыққа Жолдауында берген тапсырмаларын орындау мақсатында 2018 жылдан бастап еңбек және қамсыздандыру саласында бірқатар бағдарламалар іске асқалы отыр. Соның бірі — 2018 жылдың қаңтарынан енгізілетін жаңа форматтағы атаулы көмек. Мұндағы ең үлкен өзгеріс аз қамтамасыз етілген азаматтарға немесе отбасыларға берілетін атаулы әлеуметтік көмек кешенді болып, ол өз ішінде 3 түрлі мемлекеттік қолдауды қамтып отыр», — деді министр.
Оның айтуынша, біріншіден, азаматтарға немесе отбасыларға бүгінгідей ақшалай төленетін көмек көрсетіледі. Ол ай сайын немесе алушының өтінішіне сәйкес 6 айға шартты түрде берілуі мүмкін. «Екіншіден, жұмыс жасындағы және еңбекке қабілетті азаматтар мемлекет есебінен оқуға, жастар тәжірибесіне, әлеуметтік жұмыс орындарына жіберіледі. Сонымен қатар өз ісін ашуға немесе бизнесін кеңейтуге мүмкіндік алады», — деді Тамара Дүйсенова осы орайда. Министрдің сөзіне қарағанда, үшіншіден, қажеттілігін қарай мүмкіндігі шектеулі отбасы мүшелеріне мемлекет тарапынан кепілдендірілген атаулы әлеуметтік көмек көрсетілетін болады. «Жаңа форматтағы атаулы әлеуметтік көмекті енгізу үшін үстіміздегі жылдың 1 шілдесіне дейін қажетті нормативтік-құқықтық актілер мен автоматты түрде есептейтін ақпараттық жүйелер толық дайындалып, облыс, аудан және қала әкімдіктеріне жеткізілді», — деді ол.
«Жақсы сөз — жарым ырыс» дейді қазақ. Алайда «Алмақтың да салмағы барын» ұмытпаған жөн.

(9)