31 арна «I’m а singer Kazakhstan» жобасы үшін көрермендерге кастинг жариялайды

«I’m а singer Kazakhstan» жобасына қызу дайындық жүріп жатыр. Қатысушылар іріктелді. Енді кезек көрермендерге келді. Талант-шоудың форматына сәйкес ең үздік орындаушы халықтың дауыс беруінің нәтижесінде анықталады. Ұйымдастырушылардың пікірінше, бүгінгі таңда үздіктерді іріктеудің мейлінше тәуелсіз, ең объективті әдісі осы екен.   — Бұл жобада үздіктерді іріктеудің бүгінгі таңдағы ең демократиялық және объективті әдісі жасақталған. Залда отырған 300-ден аса адам шоудың әрбір эпизодында қатысушыларға дауыс беру мүмкіндігіне ие болады, — дейді «31 арнаның» Бас директоры Бағдат Қожахметов. —Айта кетейін, «халық қазылығы» құрамына енетін көрермендерді іріктеу әдісі де қатысушыларды іріктеуден кем түспейді. Залда музыканы түсінетін, өнерді бағалайтын жандар отыруы керек. Сонымен бірге, біз Қытай, Қырғызстан, Өзбекстан, Татарстан және басқа да әртістері жобаға қатысатын елдердің әрқайсысынан көрермен келеді деп келісім жасасып қойдық. Біріншіден, ол объективті пікірлердің қалыптасуына көмектессе, екіншіден, шынымен де нағыз мықтыны анықтайтын халық қазылығы дегеніміз осы.   «I’m а singer Kazakhstan» шоуының қатысушысы атанып, «Халық қазылығының» құрамына енуге кез келген қазақстандық үміт білдіре алады. Ол үшін «Халық қазылығы» деген белгі салып, casting@31.kz мекенжайына өзіңіз жайында ақпаратты және әлеуметтік желідегі парақшаңыздың сілтемесін жіберуіңіз керек. Жасқа шектеу қойылмайды.   Өз қолыңызбен жұлдыз жағу мүмкіндігіне ие болыңыз!

(17)